ni'o sei lisri be me'e lu le su'u le bradi mo'u klama la tlunranan. se'u

to'i la danseini ku voi nobli cu finti .i la gleki ku noi na nobli cu fanva toi

pu ze'u se djuno lei ze'u renvi gi'e se jijnu ca le temci be le nu le dzena ca jmive vau fa le du'u le bradi be le se nei ba klama la tlunranan.

.i le ji'a detri cu jai se djuno fa le ji'a pa vorme voi le bradi cu klama fo lu'i ke'a .i je no da djuno fi le bradi fe su'o drata be le du'u ri me le cevni gi'e ku'i kansa le remna le ka xabju

.i ca ku la tlunranan. noi sivni zdani le se lijda zi'e noi ralju le'i malsi be le nu makfa cu se terpa le'e jbini be le'i cmana be'o noi le nei cu malsi fi ke'a vau .e lei sruri tumla

.i tai ku jarki gi'e galtu vau fa le canko .i je bo tai cizra fa ri ca le nu ri se pagre lo gusni ca lo'e nicte .i ja'e bo le go'i cu simlu le ka du lo palci poi catlu le remna bu'u le manku

.i fe le du'u ma kau sevzi le te makfa gi'a sevzi le vipsi be ri gi'a sevzi le pa banli ke ralju te makfa vau fa no le xabju cu djuno .i ki'u bo ro boi ma bu dasni lo xekri gacri be lo flira .e lo stedu .e lo xadni

.i to'e ki'u nai le nu le dimna be la tlunranan. pu'o fasnu vau e le nu le bradi pe le nu jijnu ne pu cu .ei klama ca le lamji nicte ne ba fo lu'i le kalri ke snanu vorme noi pu ze'u ca se cmene lu vorme co dimna li'u vau vau fu'e ku'i le rokci dinju goi la tlunranan. ca'o ku cizra smaji gi'e se sinma gi'e se terpa gi'e manku gi'e pe'a se ke nobli mapku le jai nu dimna be le nei fu'o

.i na cafne fa le nu lo prenu cu cadzu vi la tlunranan. ca lo nicte ca lo nu lo se cmoni be lei te makfa bei fau le nu lu'i ri cusku fi le na jai se djuno be ma'a cu ruble ra'i le nenri kumfa ri'a lo nu lo fulta bianfu co'a terpa .i ku'i ca le ro moi be le'i ro nicte le pa prenu fi le dinju voi se drudi loi sudga je xekri srasu vi le mu ckunu cu mo'u klama mu'i le ka viska la tlunranan. za'u re'u ku ce'e pu le nu le bradi noi me le cevni gi'e ku'i kansa le remna le ka xabju cu klama gunta la tlunranan. ja'e le nu ri mo'u marji

.i bu'u le jbini be le'i cmana fa'a le galtu le go'i goi prenu bu klama tai le nu ri virnu. i ku'i le go'i cu mutce le ka terpa .i je le go'i ca'o jdika le ka xo kau va'e virnu vau li so'o

.i prenu bu mo'u klama fo lu'i le snanu vorme noi pu ze'u ca se cmene lu vorme co dimna li'u

.i prenu bu mo'u klama nu'i pu gi le manku ke clani kumfa gi le galtu fo lu'i le marmaro serti nu'u mu'i le ka viska le ro moi voi co'e la tlunranan.

.i bu'u le galtu pa xekri silka murta cu dandu .i je prenu bu mo'u pagre fi le kumfa voi bu'u ke'a so'i murta cu dandu zi'e voi ke'a manku ja'e le nu ke'a zmadu fi le ka xo kau va'e le ka xekri vau vau fe ro skari be ri bei ma'a

.i bu'u le manku kumfa voi bancu fo le ka se viska vau fe le kunti se bargu vau lei te makfa ne le ve'i jelca voi fagri lei lakse cu zukte le makfa be fi le nei gi'e to'e cladu bacru cusku le valsi be le fasnu ba'a

.i ro ratcu pe le stuzi ca'o pagre fi ku fau le nu le nei cu klama le dizlo fo lu'i le serti

.i prenu bu noi klama fi le dinju voi se drudi loi sudga je xekri srasu cu pagre le bi'u nai kumfa noi re moi lu'i ke'a .i je le te makfa na catlu le go'i gi'e na co'u to'e cladu bacru

.i prenu bu pagre fo lo jbini be le'i te makfa fe le tilju murta voi si'a xekri silka ku gi'e mo'u klama le kumfa voi co'e lei xekri marmaro gi'e se zvati no muvdu

.i pa ve'i jelca cu fagri bu'u le kumfa noi ci moi lu'i ke'a .i je no da canko kumfa bu

.i cpana le xutla loldi gi'e jibni le xutla bitmu vau fa le silka marbi voi ve'i kumfa fi lei murta noi lu'i ke'a simxu le ka lamji .i le nei cu du le traji be le ka censa be'o ne le palci stuzi gi'e sivni kernelo ri

.i ro mlana be le bi'u nai marbi cu se jibni lo manku marji poi me ke'a fa lo nanmu .a lo ninmu .a lo se dasni rokci .a lo danlu poi se ctuca certu le ka smaji

.i ca le nu le mabla nu na muvdu ne le sivni co'u ka'e se renvi le nei vau prenu bu noi klama fi le dinju voi se drudi loi sudga je xekri srasu vi le mu ckunu cu klama fa'a le galtu le silka marbi gi'e co'a virnu je xanka jgari fi le xance fe pa le murta gi'e lacpu ri ja'e le nu ri mlana kei gi'e viska le sivni kernelo gi'e cmila

.i le pu se djuno co'a fatci .i je la tlunranan. na ba di'a se terpa le jbini be le'i cmana .i ku'i je le te makfa cu klama fi le banli ke clani kumfa ne le nei gi'e bajra klama fo lu'i le foldi fau le nu le nei cu klaku gi'e darxi le tatru be le nei .i se ki'u la'e di'u le jai nu cmila cu du le bi'u nai bradi be la tlunranan. be'o voi jai se dimna ri fai le ka klama fo lu'i le pa snanu vorme noi pu ze'u ca se cmene lu vorme co dimna li'u .i je le go'i cu cevni gi'e ku'i kansa le remna le ka xabju